網上好耐之前已經話Panasonic會有部比GD88細好多嘅手機推出，型號為X60，不過網上多數只係流傳其初稿圖片，實物相都唔多見，不過呢部傳聞中嘅新機上星期就喺先達忽然現身，羅新基當然唔放過呢個機會影兩張相畀大家先睹為快。呢部X60連產品貼紙都冇，只係得個VodafoneLogo喺機面，體積比GD88細成個碼，見到真係嘩嘩聲，據網上資料顯示雙頻加埋影相都只係78g，重有MMS同GPRS，期待度真係爆晒燈。不過今次呢部X60由於冇電池嘅關係，未能開機玩個痛快，但已經令羅新基流晒口水喇。
文：羅新基
要數雙彩芒影相手機，𠵱家都重係非NECN8莫屬，不過話晒都出咗一段日子，係時候加點新意，上星期有批水貨N800到咗，外形同N8十成十相似，只係多咗內置嘅兩款會郁Wallpaper，選擇就略嫌少咗啲，而GPRS、40和弦及10萬像素鏡頭當然照舊喺度。N800開價要$3,780，同N8個價錢差唔多，值唔值就見仁見智。
查詢：23987320（鉑匯科技）
講緊嘅中橋並唔係國貨公司，而係新到港嘅手機牌子，呢個型號為D1嘅紅卜卜手機，係之前韓國TopluxVG200嘅OEM，生產地由韓國去咗中國，功能當然有齊韓國手機嘅大熱，65,536色彩芒、40和弦等，機身細細，唔使問梗係專攻女性市場，所以內設經期計算程式。開價$2,480，有65,536色彩芒加埋超細機身，價錢都算合理。
查詢：23987320（鉑匯科技）