美股上周五回落，估計對港股只會嚇一嚇，無礙港股向上大勢。上半年經濟環境咁差，又有沙士襲港，東亞（023）盈利來自本港為主，半年盈利仍有5%增長，勝過預期。滙豐（005）今日派中期成績表，已有北美上半年成績靚靚墊底，而歐元區盈利亦因歐元大升，同埋歐元比例頗大嘅得益，盤數應獲市場受落。
滙豐上周五單日升幅1元，收96.75元，派成績表後應有升勢，破5月97.50元後邁向「紅底價」，滙豐Call輪係時候上車。
滙豐Call輪9763，上周五升8仙，升幅11.3%，9月26日到期，輪價79仙，負溢價0.9%，槓桿率12.2倍，條件相若嘅9632，只升得5仙，收75仙，呢隻「筍輪」平靚正，最值得買。隻輪9月10日到期，負溢價1.3%，大過9763，槓桿率12.9倍，亦高過9763。
點解9632咁嘅負溢價？滙豐今日派中期成績表，如變化不大，則派息1.4港元，並喺本月第3個星期除息，即係隻輪夠鐘前除息，股價調整股息，現價96.75元等於將來95.35元，用呢個價計9632溢價，咁啱平水。但用平水有13倍槓桿率賭9632，都係值得。
想買賣易，唔使為滙豐除息問題左計右計，又想搏殺，則揀9845，12月初夠鐘，現價52仙，有18.6%槓桿率，當然要畀高啲溢價，係3.6%。
章盛