上周最後兩個交易日，美國所公布的經濟數據其實相當靚，但美股只係一陣虛火後就回吐，市場解釋GDP上升係因為美伊開戰，國防開支增加所致，而失業率下降係放棄求職人士增加。如果市場反應時時咁「公正」，則炒股票輸贏都會順氣啲。上周五杜指跌79點，收9153，納指跌1.1%，收1715。
美股似揀壞消息炒，港股上周五偷步先升113點，唔知今日會否要本利歸還？照計今日滙豐（005）收市後公布業績，好淡暫時都會按兵不動，港股波幅估計有限。恒指5日線在10168，短期升軌在10158，可有已有初步支持力，後市去向當然係市場對滙豐業績的演繹。
此外上周孫公再出招救樓市，唔知係咪有高人指點，居然識得無招勝有招，公布完一輪樓市供求改善的數據後，只話10月先有新措施公布，留待市場無限想像空間，深諳股市炒預期的法門。上周五地產股全面上升，新地（016）及恒地（012）升逾4%，希慎興業（014）、鷹君（041）升逾7%，信置（083）及香港興業（480）更升逾10%。相信10月之前，地產股仍可反覆向好。
香港興業上周五勁升12.9%，收1.70元，成交7416萬元，真係好多年未見過咁大成交。以勢論勢，興業升破01年5月以來長期降軌，只要守穩1.63元及突破1.78元，首個目標上望2.10元，可在1.65至1.75元收集。
趙飛雲