老董嘅問責制推行咗一年，已經搞到五十萬人上街，一司長一局長要下馬，真係一頭煙。
眼見個大老闆團團轉搵人補位，個個局長都唔敢請假，只有何志平例外，唔知係咪因為佢點都冇機會做財爺或保安局局長，所以唔關佢事啦。
何局長由上周六起放一個禮拜假，算係成功搞掂咗賭波合法化獎勵吓自己。不過，佢會喺星期五，即係八月八日趕返香江，出席皇馬同港隊舉行嘅友誼賽盛事。
何局長上次因為私人問題去唔到捧利物浦場，今次喺開場前會有個酒會，何局長負責招呼啲領事同埋尊貴議員，點可以唔現身？
至於佢因乜嘢私事放假，佢位新聞主任死都話唔講得。
咁又係嘅，唔趁住暑假唞唞，一陣間新人又上場、立法會又開鑼，老董又捉住大家集思，真係死都唔掂咯。
傳真︰2623-9278
電郵︰