二人女子組合at17的成員林二汶從前是小霸王，不但與兄長林一峰為爭玩口琴而大打出手，還曾被老師罰扭耳仔遊街。而盧凱彤小時候最愛玩滾軸溜冰，就算撻到周身傷，也要每周蒲維園踩roller。
女子組合at17的兩位成員，年僅十七歲的盧凱彤（Ellen）和二十歲的林二汶，小時候均非常好動，尤其是花名「意粉」的二汶，更是個小霸王，不但與兄長林一峰開片，又喜歡欺侮同學，可謂「無惡不作」。
日前at17在九龍塘接受本報訪問時，二汶說：「阿哥大我七年，記得細個同佢打交，爭口琴玩，我重俾口琴塊片割到手，到𠵱家都有疤痕。以前我乜嘢都睇阿哥頭嘅，因為佢太叻，唔使讀書，科科一百分，全校考第一，我同佢同一間學校，老師會覺得佢細妹都會係咁，但我懶，鍾意玩，讀書又唔好。我好服阿哥，但又唔妥佢，因為我好勝，覺得點解佢得我唔得。」
二汶念小學一年級時，更以欺侮同學為樂，她說：「我係典型衰到爆，蝦同學，用啲蠟筆碎倒落人哋個頭度。後尾有次我俾同學插贓嫁禍，話我攞人哋本手冊，結果我俾老師扭住隻耳仔遊街。」
而出身於小康之家的Ellen，童年相當幸福，十歲時迷上踩roller，每周蒲維園的滾軸溜冰場，她說：「嗰時我去維園踩roller，重識到一班鍾意踩roller嘅朋友，佢哋代表香港出賽㗎。不過成日搞到周身傷，連牛仔褲都磨爆埋，兩個膝頭哥又流晒血。」
Ellen續說：「不過我細個時好乖，又唔使錢，淨係踩吓roller。而我阿哥一直喺加拿大，好少見佢，以前會覺得有啲疏離，但𠵱家大個咗，感情反而好咗。」
採訪：朱芷瑩
