XBOX暑假行貨勁Game陸續出籠，繼試玩《MidtownMadness3》後，再接再厲，率先試玩另一勁作《BruteForce》。擺明食《HALO》賣點嘅Game，以重火力武器同騎呢人物，再加極度重要嘅團隊合作精神，野心成為XBOX銷量冠軍。
記者、攝影：徐影龍
《BruteForce》呢個月8號先見街，玩法就跟《HALO》實在太相似，同樣一條友拎住武器邊行邊打，遊戲內武器設定特別多，由狙擊槍到彈弓槍都有，最正係雙機關槍，兩大支炮周圍瘋狂猛射，機迷肯定勁High。玩家亦不時要利用地形環境作閃避、躲藏，不過《BruteForce》就將地形變化發揚光大，特大室外版圖範圍超大，又有好多騎呢古怪建築物畀你玩戰術，好過《HALO》大部份時間喺室內度打。
有咁大咁複雜嘅版圖，玩起團隊就更為刺激。由於最多支援8人連線對戰（兩部XBOX），4打4已經夠晒熱鬧，憑住武器特性同地形環境，各人分布唔同位置迎擊敵人，團體戰略優劣已可定勝負。
行貨《BruteForce》賣大包，隨Game附送一張主題貼紙，將部XBOX搖身一變成《BruteForce》主機，最正係加送一隻金屬製主角公仔（Brutus或Hawk），相當之重手。星期三開始，到漫畫節嘅XBOX展館預訂《BruteForce》，重額外畀埋另一款金屬公仔你，Fans就可儲齊兩款角色喇。
香港XBOX終於開始推廣XBOXLIVE，特登訂做四部機座，畀入漫畫節人士大玩，雖然係接駁至美國Server，不過可任意搵人對戰，等一眾鬼仔機迷領教香港Gamer嘅厲害。不過近日有傳聞話XBOXLIVE11月推出，XBOX推廣負責人Amy證實完全冇咁嘅事，目前仍只係計劃緊招募測試員，絕冇可能11月見街。不過Fans唔使失望，Amy承諾解決相關技術問題後，一定盡快將XBOXLIVE推出香港。
XBOX「至潮」夏日動感地帶：
地點：灣仔會展1號館
時間：8月6日至9日上午10時晚上9時，8月10日上午10時至晚上8時