徐子淇、名模陳嘉容昨日到黃埔，與名種貓行騷。徐子淇抱貓出場，合拍非常，但玩遊戲時，卻給一隻高竇貓考起，任徐子淇出盡法寶，高竇貓懶理之餘，還背轉身坐着不動，十分搞笑。
徐子淇、陳嘉容、蕭正楠和陳驊昨日到黃埔新天地，出席「Marie花都之旅開幕禮」。徐子淇與陳嘉容抱着名種貓行天橋，小貓一見靚女異常乖巧貼服，更主動依偎在二人的膊頭。
但其後，徐子淇和陳嘉容要引小貓行到目的地玩遊戲，徐子淇卻被其中的一隻淺啡色高竇貓考起，她出盡法寶，不管是拿羽毛、又或不停「喵喵」叫，高竇貓依然寸步不移，後來更擰轉身坐着不動，一副不理睬徐子淇的模樣，場面搞笑。
徐子淇接受訪問時，表示沒有養貓經驗，但家有愛鼠，她說：「我喺英國養咗一對倉鼠，係今年情人節男朋友送咗一隻畀我之後，我再買多一隻，佢哋好可愛，不過一般養一、兩年就死。本來今次想帶返香港，又怕冇時間照顧，𠵱家喺英國畀人代養，好貴㗎，四個月要使五千港元。」
陳嘉容則表示男友Ricky患鼻敏感，故不便飼養寵物，加上早年有傷心經驗，她說：「我六年前養過一對北京狗同西施，但有次大意走失咗，搵唔番，好傷心，喊到眼都腫晒。」
此外，陳嘉容開心透露新書面世首日，已賣出二百多本。
採訪、攝影：RitaLeung
