有逛開日本百貨超市嘅，都應該喺飲品架見過Suntory呢個名，不過原來呢個唔只係飲品牌子，重係喺日本有數以百計餐廳嘅名牌飲食集團；今日，Suntory集團正式進駐香港，喺銅鑼灣開設全港首間Suntory集團餐廳，帶嚟嘅有曾於加拿大、台北、上海擔任Suntory日本料理店總廚吉田先生，以及喺香港絕少機會食到嘅日式煲仔飯——釜飯。
記者：馬慶武 攝影：陳盛臣
Suntory唔只係日本嘅大型飲品、酒精生產商，集團旗下嘅餐廳更遍布日本，主力係各式各樣嘅日本料理。而且Suntory嘅飲食勢力更開始擴展至亞洲各地，繼台北、上海後，香港將會係Suntory飲食業務發展嘅主要新目標，更計劃於05年內在日本以外開設20多間分店。
東京和食Sun，無論菜譜或裝修環境，都糅合咗現代、傳統嘅日本特色。首先菜式方面有燒、煮、炸、魚生等各式日本料理，全部菜式都係由日本Suntory嘅TestKitchen撰寫，更派嚟有20年入廚經驗，熟悉各式日本料理嘅吉田慎二撐場監督，保證烹調製法傳統有風味，亦會加入現代新元素，好似其中一款釜飯，就加入鵝肝作材料，更有新鮮感。
話係全港獨一無二嘅美食，釜飯有咩咁吸引先？「釜飯日文拼音係Kamameshi，當中嘅Kama就係指釜，即係載住啲飯餸嘅金屬器皿。叫得做釜飯，就一定係用呢個Kama嚟整，將上等日本米加上餸菜調味料放晒入去Kama之後，就會成個拎去燒，燒大約13分鐘就完成。不過要燒得均勻就要用一個特製、啱啱好放得落成個Kama嘅爐，呢個爐好少地方會有，所以香港無乜機會食到正宗釜飯。」大廚吉田先生更話用特製嘅爐燒，效果最好，材料嘅肉汁精華會均勻混入白飯中，令整窩釜飯都充滿鮮味，而用唔同嘅材料就會有完全唔同嘅口味，配搭極多。
用上鵝肝為材料，極有Fusion特色。照燒鵝肝味道香濃，牛肉亦夠腍夠味，不過食過先知，煙韌入味嘅釜飯先係精華所在。
齋睇賣相已可感覺到其清新口味，香葱嘅清香味，和鮮甜嘅吞拿魚肉碎、軟滑嘅豆腐非常配合，天氣咁悶熱，呢個冷盤最啱用嚟開開胃口。不過份量較少，三兩啖已經食完。
Homemade甜品，一條條嘅布甸夾雜黑芝麻茸，香味極濃，而且夠香夠滑入口即溶。連唔多嗜甜嘅攝影師都要連隊兩杯先夠喉。
地址：銅鑼灣時代廣場食通天13樓
電話：25061838
營業時間：中午12時至下午3時，下午5時至凌晨1時