紅足十二年「老」而彌堅
SMAP年過25夠麻甩擄盡師奶心

日本五人組合SMAP雖然有好多負面新聞，但依然可以紅足十幾年，唔係話我羅拉睇小佢哋，而係藝能界咁多偶像男組合，十居其九過咗二十五歲都唔紅。老實講，SMAP喺香港嘅忠心fans已經買少見少，佢哋喺日本之所以重咁紅，其實全憑一班師奶fans。

老公都唔理
SMAP呢排開緊巡迴演唱會「SMAP’03MIJTOUR」，我羅拉淨係睇咗愛知縣嘅一場，有七成都係三張幾嘢嘅師奶fans。部份師奶帶埋仔女去睇，不過多數都話老公同仔女在場只會阻手阻腳，叫老公車完佢哋去會場後，拿拿臨返屋企湊仔。
班師奶fans喺會場即刻買咗幾千蚊演唱會產品，之後換上打氣戰衣，有啲以tubetop打底再襯自製偶像小背心，頸戴「ILOVESMAP」頸鏈，連指甲都畫埋打氣字樣。

用錢撐人氣
我羅拉終於明白，SMAP有呢班咁有財力嘅追隨者，人氣想跌都難。有fans又話，SMAP重做緊光Genji嘅伴舞嗰陣，已經愛上佢哋，望住十一歲嘅囝囝，就諗起已經捧足SMAP十二年。我羅拉未到嗰個年紀，都幾難領略到佢哋嘅感受。