滙豐銀行出咗名透明度高，噚日收到佢哋一份講去年在全球做咗乜嘢社區貢獻嘅小冊子，一樣詳盡，包括捐款數額、獎學金、環保成績，令八方眼界大開。不過，大家當然最關心香港嘅事，可惜滙控只提供細分至亞太區捐款額，係六千二百萬元，全球則約二億七千萬元，希望下次可有埋香港嘅數額啦。
至於環保成績，滙豐就有提及香港，因為佢哋喺香港嘅大部份辦公地點，已經採用鹹水沖廁及運用冷凍系統，令到香港區用新鮮水嘅數量低於其他地區；但咁都唔及倫敦新總部咁激，原來滙控計過新總部每年會用九萬桶蒸餾水，為咗環保，佢哋會將所有桶攞去集團旗下蒸餾水廠加水，將水桶循環再用。
另外，滙豐很重視員工培訓，去年平均用在員工培訓嘅開支達一億元，若以受訓員工數計，平均每個用了六千元去培訓，雖冇比較，但肯定係重手僱主之一。
傳真︰2623-9278
電郵︰