暑假又嚟啦，最開心嘅莫過於辛苦咗成年嘅學生哥，雖然今年暑假因為受早輪「沙士」嘅影響而放少咗好多日，但其實計計埋埋都有成四、五個禮拜，對於好似愛心大使呢類一年只得十一日大假嘅打工仔嚟講，真係羨慕到暈。
講開又講，當大使重係學生哥嘅時候，每年暑假例必會約埋幾個同學仔一齊走去做暑期工，一嚟好過坐喺屋企咁悶，二嚟又可以賺番啲書簿學費，幫補吓屋企。不過，近年香港市道咁差，失業率又高，有經驗嘅大人想搵一份工作都唔係咁容易，更可況係冇乜經驗嘅年輕人，唔怪得好多學生哥都同大使呻：𠵱家要搵一份暑期工簡直難過登天。
不過，搵唔到工又唔等於要坐喺屋企浪費時間，大使就建議芸芸學子不妨利用呢個大好假期去做吓義工，充實自己。大使就知道坊間有好多間社會服務機構都招募緊義工，每間機構都有唔同嘅服務性質同服務對象，學生哥大可以揀選適合自己嘅去做。
做義工唔單止可幫人，自己重可以學到好多嘢，如待人接物、服務技巧等等，呢啲都係喺書本上未必學得到嘅，計落真係有賺。
暖流熱線
電話：29908688
傳真：23702192
電郵：
網址：