十位候選成員唔見標青
馮仁昭四圍超：Cookies揀蟀冇個係Fans

女子組合Cookies噚日喺銅鑼灣Neway出席「Neway特選Cookies新鮮出爐發佈會」，今次Cookies招募新成員嘅反應都幾熱烈，之前有成五百幾人參加，而噚日就宣布最後十強嘅名單，不過水準就好一般喇。問Cookies佢哋有冇心水，點知佢哋話：「要了解多啲先知，不過外表唔重要嘅！」

個人喜好
見到成班女仔參加Cookies招募新成員比賽，以為佢哋一定係Cookies啲fans啦，點知睇番十個女仔嘅小檔案，佢哋居然冇人喺最喜愛歌手一欄填上Cookies個名，而Cookies就話：「呢啲係個人喜好啫，唔一定要鍾意我哋先參加得。」
Cookies重話今次招募新成員佢哋都有份畀分做評判，Theresa話：「佢哋唔識唱歌跳舞都唔緊要，我哋之前都training咗大半年，所以佢哋喺training嘅時候表現好，就一樣有機會㗎。」

千嬅收LEGO模型開心
楊千嬅一向係LEGO迷，自從上次公開講過話鍾意一個由LEGO砌成嘅自由女神模型後，LEGO公司就好識做送咗一個畀佢。噚日千嬅出席喺沙田舉行嘅「樂高百變創奇積」活動，佢話都好鍾意恐龍、海盜船模型，結果負責人好識做，即場送咗兩個絕版LEGO恐龍模型，千嬅猛話唔好意思，重話冇迫人㗎。

安仔輸波賴貓
許志安噚日同桌球好手傅家俊，參與「挑戰紅人桌球大比拼」，「業餘」嘅安仔以三十七比六十九分輸畀傅家俊，喺比賽期間，安仔好緊張，傅家俊話：「你唔使咁緊張喎，玩吓啫﹗」而安仔喺最後一球竟然想「賴皮」，佢話：「呢球邊個入到就算贏。」

蔡依林無緣見碧咸
蔡依林噚日出席喺馬鞍山舉行嘅「蔡依林看我七十二變簽唱會」活動，現場Fans表現得相當興奮，而佢本身就視碧咸係夢中情人，佢知道對方會嚟港比賽，重主動問記者知唔知碧咸住邊間酒店，佢後嚟話：「我知碧咸周五會在港作賽，只可惜我周三便離開香港。」

Boy'Z豔福無邊
組合Boy'Z噚日去到海運大廈出席一個卡拉OK比賽活動，原來Kenny前日唔小心扭傷腳，但係佢依然好落力咁又唱又跳。而大會為咗獎勵佢哋，特登送咗一個冰結他畀佢哋，重有兩個三點式女郎獻吻㖭。