港股近日大上大落，伏勝即刻諗起偉易達（303），皆因隻股成日都好難捉摸，上星期初由8蚊炒上去11蚊，星期五就由接近10.7元直插到最低9蚊，十足一隻俾洗倉嘅莊家股。
聽聞今次隻股突然大跌，係因為有個大戶計錯數，買多咗成百萬股，由於未有準備足夠資金交收，結果星期五下午要沽貨。其他炒家見個大戶出貨，以為隻股會散，就出嚟掟埋一份。不過有行家話，隻股應該唔死得住，皆因之前「龍蝦」證券出咗份報告，話會睇到14蚊，呢幾日都見龍蝦個牌好勤力咁出出入入，所以如果有機會再見到9蚊，不妨入啲嚟坐下。
睇番伏勝其中一隻心水股意科（943），雖然上個禮拜復牌後嘅表現唔係好突出，不過都算過得去，唔係好見有大手沽盤出現，最低都只係落到去3毫1。
間公司上個星期終於都落實咗跟文傳（343）同埋美國納指市場股份Transmeta組成中文標準Linux嘅三劍俠聯盟，意科同文傳重會佔新公司四成二及四成一股權，Transmeta只係佔一成七左右。如果各位有細心留意佢哋個公布，其實唔難發覺意科喺呢單交易裏面可以有5600萬潛在盈利，雖然公布話管理層無意將筆盈利入帳，同埋話暫時無意分拆，不過既然有嚿咁大嘅肥肉擺喺面前，無理由唔食，所以伏勝估計分拆應該係遲早嘅事。