吳君如昨日度過三十八歲生辰，可惜導演男友陳可辛身在美國，君如表示男友無暇相伴並不要緊，她說：「佢喺度咪又係兩個人食餐飯然後返工，係唔係一齊過生日根本唔重要，最緊要兩個人相處，互相遷就。我哋兩個性格都太強，所以當有一方遷就另一方，睇到會好欣賞，唔會再刁難對方。我間唔中都會小鳥依人嗲一吓，扮一個迷人嘅樣就梗有啦。」
懂得互相欣賞正是維繫感情的基本功，難怪吳君如與男友拍拖六年多，至今仍甜甜蜜蜜。平時不拘小節的吳君如，一提到陳可辛，眼神總流露出女性溫柔，原來當初有線斟她做主持，亦事先徵詢男友意見。
吳君如說：「你知啦，做電台已經好困身，我平時又鍾意吃喝玩樂，同佢（陳可辛）周遊列國，男友去公幹又跟埋去，所以我都有問佢意見，佢話：『呢個係你強項』，咁我咪做囉。」
自言在心態和年齡上都適合結婚的君如，每當被追問何時結婚時，她總笑說：「結㗎喇！」其實結婚與否全由君如一人話事，她說：「其實我隨時可以結，而佢又已經準備好，但我要諗嘅係，我願唔願意犧牲我嘅生活，目前我重好鍾意做嘢，就算我話出年結，但到時可能有套戲劇本好好呢！
「人生有太多變數，不過我係會結婚生仔，生唔生得出又係另一回事，但如果一生就一定會生四個，真係四個。我相信自己係個稱職媽咪，佢更加比我稱職做老竇啦，佢比我冷靜、積極、有耐性。」