自從早前黃伊汶喺日本跟過松任谷由實學藝之後，前日松任谷嚟香港籌備個唱，黃伊汶由接機到記者會到夜晚陪食飯，可謂相當周到，點知松任谷都唔認得佢，真係好笑。
前晚松任谷約咗黃伊汶去灣仔福臨門食飯，松任谷到場時，一落車就行去附近嘅報紙檔，一手拎起一本鄭希怡（Yumiko）嘅寫真畀記者影相，然後指吓福臨門，正當大家都有啲疑惑佢係乜意思嘅時候，黃伊汶就落車同佢一齊入去食飯，黃伊汶助手問記者點解松任谷會攞住Yumiko本寫真影相，照計佢唔識Yumiko，現場就有人估佢可能以為係黃伊汶。
估唔到黃伊汶陪咗松任谷成日，對方竟然會誤認死敵Yumiko係自己，唔知好嬲定好笑。好多人都知松任谷由實喺日本樂壇好有地位，有人問佢嘅地位係咪好似梅艷芳喺香港樂壇咁，環球宣傳人員就話唔止，應該好似白雪仙咁，可以話係日本仙姐。
胡杏兒同李嘉慧噚日喺銅鑼灣出席宣傳活動，由於電視劇《律政新人王》播出後反應理想，為胡杏兒帶嚟唔少賺外快機會，佢話：「近日多咗好多大型廣告接洽中，但就未可以公布，另外今個月八號會去美國登台，之後返香港就開新劇。」問佢頻頻登台，豈非豬籠入水，杏兒笑話：「可能我忙拍劇，根本冇機會用錢，一個月都係用幾千蚊嚟交租同食嘢，我目標係向人生第一桶金邁進。」
鄭裕玲（嘟嘟）噚日到港台接受前任環境食物局局長任關佩英訪問，對於賭波合法化，嘟嘟就話自己對賭完全無興趣，又話已經戒打麻雀四年，不過佢就踢爆呂方好鍾意睇波，重話：「佢鍾意睇波，重睇到好緊張，旁邊啲人會以為佢賭成副身家㖭。」
無綫非戲劇分部助理總監何麗全，上個月因涉嫌樂壇貪污案而被拘捕，佢目前放緊大假。不過，呢幾日盛傳何麗全向無綫辭職，馮仁昭即刻打電話問外事部助理總監曾醒明，佢同製作部總監汪岐了解過後，話目前重未接到消息，跟住馮仁昭打電話畀何麗全，但佢話𠵱家乜都唔方便講。
由張達明主持嘅亞視新節目《拍住時代走》，今晚八點半首播，咁啱撼正港姐準決賽，問達明怕唔怕輸收視？達明話一啲都唔擔心：「港姐年年都有，我哋呢個係資訊同娛樂並重嘅節目，今集除咗有李燦森同樋口明日嘉做嘉賓外，重去到日本拍外景㖭。」
