香港馬會暫時就只係開歐洲四大聯賽嘅比賽標準盤，但濠江就唔同，其他比賽、甚至係友賽都照有賠率，重開埋亞洲盤。日前開出皇馬對中國龍之隊呢場友賽嘅盤口，初盤皇馬讓兩球半，臨場冧飛到兩球半/三球，最終讓兩球半低水，結果贏四比○，上盤順利開出。
雖然皇馬呢場波令球迷睇得開心、上盤客贏得愉快，不過我求大俠都奉勸大家唔好對「六條A」抱太大期望。就以對龍之隊呢場波為例，都係喺下半場換入多名後備之後，皇馬先至可以大勝。所以當佢哋喺星期二日本嘅友賽，同埋喺星期五對香港隊時，「六條A」都未必會使出真功夫。
喺熱刺鬱鬱不得志嘅艾法臣，終於甩難加盟狼隊，不過狼隊似乎信唔過佢對玻璃腳，怕佢成日傷，於是只願意為佢提供一年合約，作為一個二十六歲當打前鋒，呢份約認真短。講開狼隊，佢哋啱啱簽入H卡馬拉健健康康，只要艾法臣，實力確係增加唔少。
早幾日提過，國際米蘭終於落實法迪加嘅加盟，俾呢位之前懷疑心臟有事嘅仁兄歸隊；唔止咁，有消息話國米重會畀件十號球衣佢着。呢個係法迪加鍾意嘅冧巴，不過咪話唔提醒佢，之前兩個國米十號仔好似施多夫同埋摩菲奧，唔係走得唔開心就係無表現，話唔定係不祥冧巴喎。
車路士領隊雲尼亞里公開聲稱，有信心響兩年後帶領球隊奪得英超聯錦標。我求大俠一聽到佢咁講就覺得好笑，以車路士今季嘅使錢狀況，只要各項賽事成績稍為差少少，雲尼亞里都難保住烏紗。你等得兩年啫，恐怕老細阿巴莫域治唔等得喎。
正當車路士四處招兵買馬之際，繼續有唔少老將無聲無息離隊。繼蘇拿同埋拿索斯後，三十六歲嘅前荷蘭國腳龍門迪高爾日前已免費轉會到甲組會仔史篤城。以佢波底同埋龍門位置計，其實重有能力響英超立足，落英甲似乎真係有啲大材小用。