逢假日去茶樓，例必等一輪先可以入座，有無諗過飲茶都可以有好多種方式？一家大細可以驅車入郊外飲餐鄉村風味山水靚茶，飲完重可以行山呼吸新鮮空氣。老人家就約班Friends，晨咁早去品嘗一頓傳統早茶。後生仔女懶起身，最好就梗係幫襯無分時段嘅24小時點心舖。老、中、青三代各有所選！
一提起端記，人人第一時間都會諗起其山水靚茶。本身係原居民嘅老闆朱伯話，佢哋由山上取水沖茶，名副其實係山水靚茶，每位盛惠$2，都算超值！
師傅自製手拉腸粉，鋪滿蝦米同葱花，淋上熟油同豉油，腸粉拉得夠薄，入口唔會成口粉，加上鹹香蝦米及葱香，充滿鄉村風味。
師傅每朝早準時八點半就會開始用炭爐燒，不過只限五隻，通常一個上晝就會沽清。用炭爐燒燒鵝夠晒原始風味，味道香濃，想試請早。
茶客有幾句
陳生：「我日日都會帶埋幾隻雀嚟飲茶，三十年不變，燒鵝同盅頭排骨飯都好食。」
店名：端記茶樓
電話：24905246
地址：荃灣荃錦公路川龍村58號
營業時間：上午6時至下午2時
每朝六點一開舖就開始座無虛席，全因幾款幾乎失傳嘅招牌點心，加上靚茶，其魅力大得連中環白領都毫不介意環境和裝修而繼續追捧！
近乎瀕臨絕種嘅豬膶燒賣，件件豬膶唔多唔少都足有一両重，墊底嘅燒賣同樣不多不少用上一両豬肉，豬肉混有冬菇及蝦仁，蒸時豬肉汁同豬膶味道融合，豬膶入口爽滑，完全無過火。
雞球大包好食在於用料新鮮，新鮮雞球、花菇混合鹹蛋黃。其中鹹蛋黃由廣州運返，鹹蛋黃流晒油，每朝賣到九點左右就沽清。
店名：蓮香樓
電話：25444556
地址：中環威靈頓街162號地下及2樓
營業時間：上午6時至晚上11時
24小時點心店愈開愈多，雖然係快餐形式，但同樣有即沖靚茶，只要畀兩蚊就可以開壺茶，其實同普通茶樓無分別，24小時營業，懶鬼幾時起身都有得食！
點心都大玩Fusion，食得多牛肉腸，不如試試呢款牛扒腸。在布拉腸粉上鋪上煎香嘅薄牛扒，再淋上香濃黑椒汁，軟熟牛扒同滑嘟嘟腸粉，配搭雖然較古怪，但總算係點心上一個新突破。
糯米卷食得多，香芋糯米卷就較罕有，外形同糯米卷差不多，但外層就選用一塊薄如紙嘅芋頭片。糯米混有花生碎，蒸熟後，煙韌糯米滲有淡淡芋香，頗特別。
一日二十四小時，為滿足不同食客要求，店內除點心外，另有多款茶餐廳食品好似各式公仔麵都有，全日供應。
店名：（點心皇燒味快餐店）喜悅皇宮大酒樓
電話：31182777
地址：上環德輔道中267-275號地下
營業時間：24小時營業
備註：不設加一服務費
朋友同我講，如果想去旺角新世紀廣場嘅美心皇宮飲茶，一定要有心理準備。因為馬拉松式等位閒閒哋要等一粒鐘。經過明查暗訪，發現有百多款點心、價錢合理、就近火車站係迫爆場原因，一於實地試吓攞張四人枱要等幾耐！
終於有位
最後Iris終於用咗一個鐘頭四十五分鐘去等呢張四人枱，Iris經侍應帶到枱前，發現茶客其實重未埋單，繼續要等多兩分鐘先有得坐！