吳君如向來敢言，在無綫出身的她公然批評無綫「開工冇收工」的制度。而近日愛討論時事的杜汶澤，原來亦是由君如一手點化，從以往的不問政治，轉變為現時對時事甚為熟悉，在港聞版亦發現阿澤的蹤影。 撰文：馮美茵 攝影：陳慧安
吳君如自從擔任電台節目主持，整個人都改變了，不再以低級笑話取悅觀眾，反而開始講時事、講政治，大鬧政府，與男友陳可辛去遊行，旗幟鮮明到不得了，彷彿多了個女版「鄭大班」。
吳君如近日還擔任有線娛樂新聞台的社長，總結每星期的娛樂大事，不過有線娛樂新聞台上星期一開台，無綫便以封殺令，禁止其合約歌手亮相有線，作為開台禮物，雖然波折重重，不過這個社長對前景仍非常樂觀。
吳君如日前說：「又唔使咁悲觀嘅，重有好多藝人係冇合約㗎，好似李嘉欣、梁朝偉、張學友、梁家輝嗰啲，我可以做呢啲明星嘅訪問；Beyond當日都有去賀開台啦，除咗本地新聞，大家重可以睇美國、台灣同內地嘅嘢。
「你又可以咁諗，寫啲衰嘢總好過唔寫，當然呢個係唔健康嘅諗法；又可以咁諗，佢當我係一個對手，先急急有呢個政策出現。當年余詠珊搞個《今日睇真D》，無綫咪又即刻整個《城市追擊》。」
歌神張學友早前表示，無綫這種壟斷行為未必可以長久，君如亦非常認同此說法。出身自無綫訓練班的她坦言，無綫壟斷娛樂圈已非一朝一夕之事。問君如可覺得無綫此舉霸道？她說：「在商言商，我覺得佢呢樣嘢唔算霸道，好似佢簽咗黎明，叫佢上個特備節目，梗係想用嚟賣多啲廣告。
「反而我覺得霸道係佢哋嘅制度，一開工就冇得收工冇得瞓，其實係睇你需要佢多啲，定係佢需要你多啲。如果係你需要佢多啲，就要接受佢呢啲條件，一個願打一個願捱，我慶幸自從一九八九年離開無綫之後，我唔再拍電視劇，亦唔需要捱呢啲條件。」
而吳君如最初邀請杜汶澤做商台節目《嘩！嘩！嘩！打到嚟！》主持時，杜汶澤只是個無名小卒，如今他人氣急升，拍電影、出書、做主持樣樣掂。吳君如見杜汶澤有成就，亦非常開心。
吳君如憶起當初在節目中，大家不再講IQ題，改為以政治和時事為話題時，杜汶澤當時完全不懂，及後君如對他說：「講咪講囉，怕乜啫，要嘗試。」估不到這句說話造就了今天會在港聞版中接受訪問，暢談時事的杜汶澤。
