分析師小Ｋ九五年入大學，九八年畢業，中學時代極之崇拜張五常，追捧張大教授文章，因此非經濟學不讀，結果如願以償。畢業後到證券行工作，邊做邊讀書，攞埋MA、（修經濟學），不過學而後知不足，再想讀落去，於是申請英國大學，獲錄取嘅話，明年就拜拜香港咯。
申請大學，必須推薦信。小Ｋ返到母校，見一位教過佢嘅教授說明來意，教授已經唔係好記得佢係邊個，聽到佢話要申請入讀英國大學研究院，隨口問一句：「去英國呀？HowisyourEnglish？」小Ｋ以為教授考佢：立即轉講英文，介紹自己，自己想做乜，點解要留學，留學之後又想做乜？講咗七分鐘先至停口。教授聽完，瞪大眼望住佢：「乜你啲英文咁掂，發音準確，非常流利？你𠵱家啲師弟，一句fullsentence都講唔到呀？」小Ｋ為之愕然，自己離開學校五年啫，師弟嘅英語水平乜跌得咁厲害呀？不過事不關己，無謂多問，總之自己不斷學習可也。
香港除咗中文大學之外，其他七間大學都係英文大學（即是以英文為教學語言），教授應該全部講英文，學生小組討論課（tutorial）亦應該全部講英文，不過一位英文大學學生同左丁山講：「講英文我哋就冇法討論落去！」真杰，睇嚟英文大學就會與一啲英文中學看齊，起碼一半課程要用中文講解。