皇家馬德里襲港，走勢比颱風伊布都強勁，九級旋風吹正香港。足總似乎冇睇天文台預告，竟然冇做足撲飛防風應變措施。好彩無釀成衝突。
大球場左近繞了幾圈十年不遇的蛇餅。自從樓市倒塌後久未現身的「插隊黨」也加入，紋身金毛強撻大佬朵、眼昭昭大搖大擺到場。雙程證內地旅客連皇家姓馬定係姓李都未搞清楚，又打尖排埋一份。露宿鎮守地盤已經兩天的學生球迷絕不低頭，向警方舉報。有星級靚腳偶像在背後力撐，球迷膽子忽然壯大，有不公平便出聲，動口不動手，相當理智，不像醉酒攪亂檔的外國波牛。還有年青人將露宿街頭當成露天嘉年華，呼朋喚友來接力排隊，為平時悶斗斗的加路連山徑帶來了一點東京原宿的味道。廿四孝父母為子女擔凳仔扇涼，排頭位的男士買到票，說打算跟女兒一同觀賞，聽到都心甜。十年後，當萬人迷不再迷人那個時候，做女兒的，依然記起這個歷史性的二○○三年後沙士的七月尾，跟父親輪了兩晚通宵。八月八的球賽踢得不怎麼樣，有甚麼關係呢，親密的回憶比幾多比幾多的入球數字更迷人，讓人回味。兩張球票的票尾沒有炒賣功能，但兩父女珍而重之，比任何證書更耐看，更有收藏價值。球是圓的，特首會邀請穿23號球衣的碧咸推銷23條嗎？哎，咁膚淺，罰你自食波餅。