如果諷刺政治漫畫愈好賣，政府管治危機愈大嘅話，董特首就真係有排驚！香港書展今日開埋最後一日，次文化堂出版嘅《建華之亂》直至噚日上午，已經賣出六千二百本，而另一本《孽留屬兒》都賣咗五千本喇！
呢兩本書好可能係全書展最暢銷嘅書，個數都重未計噚日下午同今日㖭。社長彭志銘笑笑口咁話：「真係估都估唔到個勢咁好，證明讀者都係明事理嘅。」
一如以往，工具書亦都好暢銷，好似商務嗰套「好賣過《哈利波特》」嘅《BlackCat》英語系列，都賣咗成四千幾本，第一冊重斷咗市㖭。香港市民自我增值嘅熱誠真係唔講得笑。
另外，金庸查大俠話想修改一下舊作，估唔到惹起不少讀者反對。噚日喺書展一個討論金庸名著嘅論壇，唔少出席嘅讀者同八方講，話接受唔到查大俠話要改到韋小寶啲老婆走佬，重話如果真係改，佢哋都唔會睇，只係會繼續睇番原有版本。不過，作家游清源就話，金庸呢招其實好高，皆因會搞到讀者心癢癢，好想睇吓改成點，可以吸引更多讀者。
傳真︰2623-9278
電郵︰
