我羅拉最近見到水着女星根本春美又影咗新相，起初都冇諗住介紹畀大家，因為近排根本小姐見報率簡直高過天后。
但睇過根本呢輯相真係笑爆我羅拉個嘴，佢影寫真影到冇嘢好玩，今次挑戰同行嘅吉岡美穗、小倉優子同富豪肉女叶姊妹，連過氣美國小天后BritneySpears都玩埋，擺明想辣到四處火頭啫！之不過根本又真係幾能夠捕捉到以上人物嘅特點，一睇無妨。
根本專登電個鬈髮穿金戴銀扮高貴，模仿叶美香嘅神髓，真係有幾分叶妹妹嘅味道，不過根本去得沙灘多，膚色太健康，做番啲美白工夫會再似啲，加上叶美香年紀都唔細，根本咁樣扮人都算係越級挑戰，有啲難度。
聽講根本咁多個造型最令人期待嘅，就係呢個小妹妹小倉look。穿起粉紅花花泳衣，束起孖辮仔，根本望住自己猛話怪：「真係好唔似我，我果然唔啱着粉紅色扮可愛！」人哋小妹妹嬌小玲瓏，佢就得牛高馬大，點扮都唔似㗎啦！
根本扮已經唔影水着寫真嘅吉岡美穗，學人哋紮馬尾着飄逸feel全身裙，搞到成班工作人員望住佢背脊猛話似；不過根本話佢屬於壓迫感強嘅肉彈，前面睇「腫脹」過吉岡幾倍，扮治療系女星始終格格不入，冇乜說服力。
根本扮BritneySpears就最容易，皆因兩個人嘅「啡唇」品味都係麻麻，不過根本唔係幾滿意呢個造型，佢話：「我體形都似外國人，但與其話我似Britney，不如話我似女子摔角手。」嘩！根本喺度踩人定自嘲呢？