最近大家茶餘飯後嘅話題，似乎都離唔開歐洲足球勁旅訪港，先有英格蘭嘅利物浦，跟住重有西班牙班霸皇家馬德里，而日本偶像雜誌《Junon》咁啱又搞咗第一屆「Junon盃」足球賽，重邀請到少男組合FLAME組隊參加㖭。
其實皇馬喺嚟香港之前，會先去日本同東京FC足球隊踢一場友誼賽，所以今次呢個「Junon盃」真係夾得啱啱好。而份屬w-inds同門師兄弟嘅四人少男組合FLAME，咪睇佢哋瘦蜢蜢得棚骨咁，其實球技都唔差，比賽當日FLAME成隊人着到全身紅色，扮到好似紅軍利物浦咁，都嚇得吓人㗎！
賽事採取單循環賽制，除咗FLAME之外，重包括《Junon》編輯隊等三隊隊伍，早前話好鍾意《少林足球》嘅孖仔伊崎央登同伊崎右典表現搶鏡，右典重成為賽事嘅神射手㖭，而FLAME最後就以兩勝一和佳績成為總冠軍。
不過最奇怪係其他三隊都係五個人上陣，點解FLAME嗰隊就得四個？如果咁都贏到，其他球隊真係好打有限囉。