今晚見之女賭俠：
女球迷落注靠靚仔

足球運動雖然「陽氣」較重，但並非男士們的專利品。三位曾經與「賭波」扯上關係的女士，她們對足球博彩的熱誠，絕不比一般男性球迷遜色，講足球睇波盤亦頭頭是道，可謂「巾幗勝鬚眉」。無獨有偶，三位「女賭俠」賭波的原因，都係因為擁護心目中的靚仔球星，「型」字行頭，實行支持到底！
記者：何善華
攝影：伍慶泉

第一次賭波為迪比亞路
已有5年賭波經驗的她，還記得第一場落注嘅賽事，係98年世界盃分組初賽「意大利對智利」。「我好鍾意迪比亞路，佢夠靚仔又好腳法。嗰時澳門開始有波賭，於是同班Friends夾咗3,000蚊買意大利贏，點知迪比亞路無得踢正選，最後場波2比2平手，輸到一頸血呀！」

巴西對法國贏最多
阿貓話整屆98世界盃贏咗差不多10場，其中贏得最多的一場賽事，正是該屆的決賽「巴西對法國」。「嗰場波我託班朋友去買外圍，因為收到風話法國一定贏梗巴西，話巴西會踢假波喎！於是便一擲800蚊買重法國贏，最後法國贏咗巴西3比0，連本收番1,200蚊，總算有一個完美的結局。」

鍾意皇馬多靚仔
講開最支持邊一隊球隊，阿貓手舞足蹈話：「梗係皇馬啦！皇馬又多靚仔，個個又好波，好似魯爾識得執雞、施丹盤傳皆精、朗拿度射術精湛……但我就最唔鍾意碧咸，一啲都唔Man，成日以為自己好有型！」

外圍莊家貼士要過濾
恩恩的賭波經驗比阿貓淺薄得多，由於身邊有朋友做外圍莊家，所以恩恩多數向朋友們落注。自言是英格蘭國家隊Fans的她表示，女仔睇波多數都係因為有靚仔球星，先慢慢培養出睇波的習慣。和大多數的少女一樣，碧咸同樣是恩恩的偶像。

信外圍莊家輸錢
2002年世界盃八強賽事「英格蘭對巴西」，恩恩收到外圍莊家的「獨家意見」，話英格蘭會贏呢場波，於是恩恩投注了1,000蚊買英格蘭贏。「場波開始無耐奧雲就入咗一球，嗰一刻開心到成個人彈起，點知場波愈睇愈唔對辦，卒之場波由贏變輸。所以有時外圍莊家畀嘅貼士都要自己過濾一下，唔好信到十足十。」

「準女賭徒」望贏錢做老闆
Koey自言對足球認識有限，偶像係澳洲國腳基維爾，原本以為佢會跟隨利物浦來港踢表演賽，但因受傷未能隨團來港。Koey贊成政府實施足球博彩規範化，但卻笑言若日後收到貼士的賽事，都會考慮買番外圍莊家，因為打一個電話就可以買到，既方便又唔使排隊。「我最希望可以賭波贏大錢，之後會開番間糖水店，一嘗當老闆娘的滋味。」