繼日本三菱及萬事得汽車，於日前公布咗2003年上半年業績後，日產汽車亦於較早前公布咗有關資料，而且響汽車製造、銷售及出口數字方面，皆錄得強勁升幅㖭！
先講講汽車製造方面，日產設於全球各地嘅生產線，於2003年上半年合共產製出1,435,661部新車，較去年同期升6.8%，若以地區計算，其中日本、西班牙、英國及包括中國、台灣、南非、泰國、菲律賓及印尼嘅其他地區，升幅最為顯著，分別係10.6%、44.2%、1.9%及36.3%，惟獨美國及墨西哥嘅生產線卻掉頭下跌3.2及11.9%。
至於銷售方面，日產於今年上半年響日本本土，合共售出多達429,259部新車，較2002年同期上升7.8%，廠方相信能錄得如此升幅，係與新款Teana、Skyline、Cube及FairladyZ跑車（見圖）備受車迷追捧有關；出口汽車數量更見出色，於今年上半年合共有337,552部新車由日本出口往其他地區，升幅為12.1%，其中私家車佔其中280,581部（大升16%），而商用車則只有56,971部（下跌3.7%）。