孫九招話10月會出招托樓市，儘管唔少人話冇乜作用，個市反應尤其係地產股嘅反應，則係另一回事。升幅最勁嘅地產股，係借債較重嘅新世界（017）與信置（083），兩隻股票都冇Call輪掛牌。新地（016）與恒地（012）分別升4.5%與4.4%，結果10大龍虎榜上，有6隻係新地與恒地Call輪。
恒地Call輪9648由6仙彈上10.5仙，升幅75%排龍虎榜首位，隻輪10月到期，溢價12.3%，槓桿率25.4倍，成交有限，唔值得博。
恒生Call輪9647，收1.9仙，升73%，成為第二威嘅窩輪。恒生（011）收84.25元，只係升25仙，9647升得過火，不過佢係仙輪，仙輪波幅通常好誇張，成交又唔多，唔值得玩。隻輪今個月杪到期，溢價5.7%，槓桿率443倍。若然到期日，隻輪唔使作廢，則揸其他銀行Call輪者，亦非常肥仔矣。
死火輪第一隻係長實Put輪9741，收2仙，大散51%，重有3個星期玩完，溢價8.5%，槓桿率261倍，望長實（001）跌到行使價48元以下，唔多實際，隻輪最後都係用嚟墊煲底。長實其他Put輪9743與9744，都跌得好傷，正股就算唔再升，佢哋都會因為愈來愈近屆滿日，溢價收縮，輪價愈來愈低，然後變廢紙。
章盛