寶哥哥噚日露口風，話孫公會出新九招穩定樓市，但會出乜嘢招佢就話唔講得，寶哥哥喺度玩神秘，令人心思思。
寶哥又話唐英年可能做財爺。唐英年廠家出身，過去幾年政府用唔少錢支持中小企，如果由佢做財爺，阿虎真係驚佢會猛花錢補貼中小企發展，搞到財赤進一步惡化。
地產股噚日大升，搞到阿虎都覺得孫公今次可能有料到，本周初已買唔少新地（016）同恒地（012）嘅黑客就大有斬獲。新地及恒地分別收報48.40元及26.65元，皆升逾4%。二線地產股追落後，升得更誇張，新世界（017）與香港興業（480）升逾10%。港股最後收報10248，升113點，成交117.57億元。
卓悅（653）受惠於CEPA，本周三中央再放寬內地人來港旅行限制後，股價挾上1.30元以上水平，但其後成交減少，噚日逆市跌4.5%，收報1.27元，成交縮至1736萬元。Cookie話，卓悅升得急，開始有回吐，大家跟炒要小心啲。
地鐵（066）中期純利雖然大倒退，但股價早上略為偏軟後，下午跟隨大市造好而倒升，收報9.30元，微升0.54%。
地鐵股價表現與管理層於物業發展權之立場同樣企到硬一硬，相信打爛唔少市場人士嘅眼鏡。不過地鐵公布完中期業績後，唔少大行都叫客戶沽貨，所以地鐵沽壓仍未消除，未係吸納時機。但唔好忘記，地鐵都係港股中嘅名牌，加上有大量散戶支持，又係半隻地產股，隨時會成為投資者追落後嘅對象。
阿虎