去酒吧睇波，最緊要講氣氛。要做到令客人稱心滿意的足球酒吧，優質嘅音響和視覺效果都不容忽視。記者走訪太子及尖沙嘴區的酒吧，發現位於太子區酒吧嘅「超級聯賽2」確係正斗，一睇個酒吧名就知道係直播「英格蘭超級聯賽」嘅指定酒吧之一。在音響設備及電視機方面共耗資接近30萬，務求令球迷駐場觀看足球賽事時更加有現場感，營造在球場觀賞的感覺。
酒吧經理阿詩話，酒吧已經開咗接近1個月，先前因為「非典」關係而延遲開業，酒吧亦多得某啤酒商贊助，所以酒吧內的布置以「利物浦」為主題，到處擺放及掛滿了利物浦官方球衣、會徽和頸巾，儼如一間專為利物浦球迷而設嘅酒吧，啱晒利物浦球迷捧場，睇吓奧雲、謝拉特嘅球技。
負責人阿詩話：「我哋盡量將酒吧改造成更專業、人氣最正嘅睇波勝地，而賭波規範化正式實施後更會裝至少3部電腦，畀波迷上網落注，當然酒吧離投注站位置唔遠，臨時『補飛』都可以喺幾分鐘內搞掂。」
記者採訪當晚，酒吧正與酒廠進行「派對之夜」，利物浦球票、新款波衫、迷你足球已令一眾顧客「笑逐顏開」，阿詩話日後都會繼續與酒廠合作，喺睇波之夜搞多些足球嘉年華，他們亦直言與有線電視的關係一向不錯，希望將來會與對方合作，在酒吧內搞「直播節目」，將講波擂台帶到酒吧內。
最快到達投注站時間：約2.5分鐘
超級聯賽2
地址：旺角太子通菜街223號地下
電話：23983297
營業時間：5:00pm-4:00am
論最近投注站，相信必然在旺角警署後面花園街的酒吧，只要行過太子道西到水渠道投注站就成。在花園街的Party16酒吧，不單止在周末最多人，平時亦一樣全場爆滿。小記到場了解，發覺酒吧內靚女雲集，細數接近50多位靚女拳手忙個不停。負責人施先生稱：「我哋酒吧絕對係劈酒場，$160有6支啤酒，HappyHour就半價，平時只會播音樂，其餘就會播吓大型球賽。」
「我哋不時都會搞吓Function搞氣氛，早排就請咗一班model扮賽車女郎，今個月就有森林之夜有靚女着豹紋衫，布景都幾有Feel㗎！」
最快到達投注站時間：約2分鐘
Party16
地址：旺角太子花園街207-209A宜豐大廈地下C-D舖
電話：31139666
營業時間：5:00pm-4:00am
嫌睇波會令人精神緊張，想輕輕鬆鬆咁享受工作忙碌後的時間，倒不如約埋三五知己到Pub吧歎杯紅酒、點唱卡拉OK，閒談逸事歡聚一番。負責人Daniel表示，這間Pub的格局以紅調為主，嘗試給顧客一種高尚及寧靜浪漫嘅感覺，而Pub內的布置都以工整、簡單的構圖來凸顯「平凡中的不平凡」美感。「呢度主要係畀一班唔太鍾意睇波嘅顧客嚟飲番杯，當然一啲大型嘅足球比賽例如世界盃、英超重頭戲，Pub先會直播賽事，主力會做一間另類嘅酒吧，畀唔同品味嘅客人有唔同嘅選擇，而不是獨沽一味睇直播。」
最快到達投注站時間：約5分鐘
壹點紅
地址：太子界限街46號地下
電話：23987997
營業時間：5:00pm-4:30am
開業未夠一年，呢間極重CyberFeel嘅酒吧差不多每晚都爆棚，無計，下午3點半已經係HappyHour，每支Beer都係$12；環境咁正兼且成日搞Function，例如有現場講波、有線CatGirls騷，周不時又有LiveBand表演，最激一次更玩到吧枱TableDance，難怪咁多城中靚人到場幫襯。賭波規範化之後，據負責人Ivy稱會增強影音設備，如買多部120吋投影及電視，務求每一個位置都可以睇到電視。
最快到達投注站時間：約2分鐘
M1Bar
地址：尖沙嘴寶勒巷3-7A號萬事昌廣場地下1號舖
電話：23117212
營業時間：3:30pm-6:00am
在尖沙嘴屹立超過8年的Golden2000Cafe，經歷了飲食業嘅高低潮。現在酒吧嘅面積比高峯時期縮小了一半，另一邊轉做卡拉OK酒廊。
負責人李景祥表示：「以前酒吧每晚都座無虛席，但近幾年經濟萎縮加上沙士襲港，生意下跌超過一半，希望賭波規範化後可以刺激生意，吸納一班賭徒落場打氣，搞搞氣氛。」對於賭波規範化，李景祥話：「絕對係一件好事，酒吧內部準備安裝多幾部電腦，供客人隨時網上投注及睇即時賽果，但對打擊外圍就絕對無可能，因為𠵱家馬會提供嘅博彩種類，只能取悅一批小注怡情嘅球迷。」
最快到達投注站時間：約1分鐘
Golden2000Cafe
地址：尖沙嘴寶勒巷26-36號華寶商場地庫
電話：23679933
營業時間：11:00am-5:00am