廖秀冬局長民望甚高，僅次於曾蔭權，佢值唔值得呢個分數，開始有人懷疑嘞，譬如沙田到中環嘅鐵路，廖局長竟然叫停，實在冇乜充份理由，唔怪得交通界功能組別代表議員劉健儀大發嬌嗔，話要喺立法會動議，「遺憾」一番。
特區政府啲主要工程項目，朝令夕改，令工程界無所適從，工程師無不媽媽聲。前有添馬艦政府大樓押後，連累業界損失數以千萬元，今又有沙田中環線停建過海一段，豈止話工程界，就算地鐵亦都氣頂。九鐵爭贏咗地鐵，現在點可以話唔興建過海鐵路㗎，你估玩泥沙乎？廖秀冬唔通又係另一位卸責局長？
聽化學教授話當年：「廖秀冬畢業後，想返港大讀化學博士，潘宗光唔收，於是去咗英國。返嚟之後，想話申請做港大化學系講師職位，港大又唔請，於是惟有做另一個職位，後來見冇乜前景，就辭職不幹，去做環保顧問，估唔到咁就一飛沖天，現在咁有權勢。」
有權勢要識得運用先至可以造福人群，廖秀冬提出「買二送一」計劃，考慮工程公司請兩個全薪工程師，政府可以送一個，代付薪酬，希望能夠解決大學工程系（與基建有關）畢業生嘅失業問題。工程界議員何鍾泰博士認為此議笑甩牙，因為工程系學生連暑期實習職位都搵唔到，邊度會有公司肯買二得三吖。你話政府不時取消已經批准咗嘅工程計劃，工程師邊度有嘢做喎。