謝霆鋒前日喺上海幫一個休閒服飾做代言人，佢女友王菲前日都喺上海拍緊電影《大城小事》，但佢兩個竟然冇約會，反而霆鋒約咗早前合作拍《玉觀音》嘅趙薇飲咖啡，據咖啡室嘅侍應講，佢哋兩個表現得好親密。
前晚十一點，霆鋒喺幾名保鑣同助手嘅陪同下，去咗華亭賓館嘅咖啡室，五分鐘之後，有一個着綠色T恤嘅女仔出現，睇真啲，原來係趙薇，跟住趙薇就坐咗喺霆鋒隔籬，兩人密密斟。侍應生同記者講，睇佢哋個樣，雖然唔知係咪拍拖，但霆鋒同趙薇表現得好親密。
霆鋒同趙薇傾咗半個鐘頭左右，唔知係咪怕太惹人注目，於是趙薇就喺霆鋒兩個保鑣陪同下行出咖啡室坐車走人，跟住霆鋒又喺助手陪同下離開，記者走上前影相，就俾佢嘅助手擋開。
此外，霆鋒噚日喺上海返香港，身邊有四個保安加兩個助手，但就只得兩個歌迷接機，比上次佢返港時多咗一個歌迷，工作人員同歌迷人數係三比一，睇怕霆鋒都好有安全感。講到蘇永康婚變，霆鋒話唔知道，亦唔想講人哋嘅事。 記者戴維上海直擊
名模陳沛嘉早前同男友David去馬爾代夫一個小島旅行，今次係兩人拍拖半年以嚟首次出外旅行，佢話：「成個旅程由男友安排晒，佢叫我淨係畀個期出嚟就得啦。」
陳沛嘉又話首次喺男友面前穿上比堅尼泳衣，佢話：「我重跟咗個日本潛水教練學潛水，但係潛到落十米，耳仔已經好痛，唔可以完成個課程。
「呢個trip樣樣都好，唯一嘅遺憾係得兩日有陽光咋，其餘日子天氣都唔好。」
曾憲梓媳婦黎瑞恩生咗個女，就靜靜雞返咗屋企坐月。噚日曾憲梓去禮賓府出席活動透露孫女改咗名叫曾凱栭，佢話：「個名佢老竇改，女仔唔使跟族譜，男仔先要。」聽講曾憲梓一路想抱男孫，不過佢噚日話：「𠵱家社會都冇所謂啦，第時BB女出嚟，你哋影相唔好閃親佢呀！我冇送嘢畀佢，祝佢身體健康囉。」
陶喆噚日去港台接受訪問，佢話自己近日忙於為演唱會綵排，所以冇時間出席台灣金曲獎。不過陶喆就話睇好陳奕迅，因為佢之前都有同陳奕迅合作過，佢覺得對方唱功好好。至於前幾日佢同周杰倫（Jay）同一日舉行新碟發布會，問到佢怕唔怕有比較？陶喆話嗰日喺髮型屋都撞到阿Jay，佢哋互相鼓勵，亦唔介意大家比較。
韓國女星蔡琳同蘇有朋，日前去希臘拍攝台劇《情定愛琴海》，由於佢太掛住老公同屋企張床，噚日不惜忍受連番轉機同喺機場苦候嘅煎熬，折騰咗二十四小時至返到屋企。而喺拍攝劇集期間，蔡琳經常同丈夫煲電話粥。
而蔡琳食唔慣希臘當地嘅美食，所以一提起希臘傳統沙律就想嘔。
