小初呢排見到雞犬皆升，股市成交又愈嚟愈大，真係有多少心寒，尤其係見到世紀城市（355）一門三傑大幅勁升，然後噚日連大凌集團（211）系股份都郁埋，真係嚇到面青青，好驚細價股炒浪已經到尾聲。
大凌噚日勁升，最高見過0.04元，收0.033元，仍升37.5%，但成交金額只得137萬元，明顯同升勢唔配合。同大凌屬好朋友嘅人人控股（059），在公布以股代債後，股價亦勁升19%，收0.025元。至於其他同大凌相關嘅股份，則幾乎全部停牌。
靚女經紀話，自從同屬大凌系統嘅活力世界（8100）將控制權賣出之後，其他系內股份都陸續出售，好似早前停牌嘅數字地球（109），市場就傳聞會賣畀一位寶島音樂界人士，而更早前停牌嘅山河控股（8127），據講亦醞釀出售控股權。至於賣化妝品嘅彩虹國際（8079），情況就比較複雜，睇嚟唔易過到監管機構一關。
靚女又話，由於呢排炒股當道，加上人哋又有賣盤消息配合，故此借機炒作一下亦好正常。
慕容小初