蘭西早前提到地鐵同港龍航空合作，喺上個月底推出換平價機票優惠，唔使一個禮拜就已經滿額，地鐵決定再度加碼，多推二千張北京同上海嘅特惠來回機票。
聽地鐵物業管理高級商場市務經理陳嘉明講，原來上月搞嘅換平價機票優惠，換購人士當中，有超過兩成揸內地護照。
佢問過啲客，先知內地深圳特區報都有刊登呢則新聞，讀者睇完之後，就落嚟換機票。
今次換購方法同上次一樣，即係喺地鐵四個商場消費滿三千蚊（包括兩張超過一百蚊嘅不同店舖發票），就可用一千一百八十八蚊換一張機票，消費滿四千五百蚊，就換兩張。
另外，置地就搞「中環時尚消閒享受活動」，由今個月四號到十號，喺旗下商場店舖或食肆，單日累積消費滿千五蚊，就可參加抽獎，贏取四人曼谷豪華遊，包括來回香港曼谷機票，入住曼谷文華酒店兩晚，重送價值萬六泰銖，相當於三千蚊港幣嘅現金購物券。
東涌係新發展社區，住客大多數都係外區搬入去。不過，所謂「靠山食山，靠水食水」，一講起東涌，就聯想起，隔籬嘅香港國際機場。海堤灣畔發展商，就推銷個盤僅得嘅四個頂層相連單位，有成千幾呎，其中兩個單位有一千七百幾呎，重有玻璃天窗設計，俗稱「玻璃屋」（圖二）。
發展商話，唔少喺機場做嘢嘅員工都有去參觀。有個機師睇完話，間「玻璃屋」咁通透，上面前面同左面都有大幅玻璃窗，夜晚觀星，若果裝埋按摩浴池，日頭可以一邊享受浸浴，一邊望住開揚嘅機場，認真好享受。
想同高官為鄰，𠵱家唔使買大屋，又唔使租別墅。產業署推出位於白加道同山頂道交界嘅一個單位招租，面積五百九十二方呎，月租九千蚊，每呎十五個二，租期兩年。
不過，有意想租呢個單位嘅租客要留意，因為呢個物業實際係一個更亭嚟嘅。
上手租客係以月租八千蚊租住，約滿遷出，產業署再度放租，租金重升咗一成三，喺通縮嘅環境重可以加租，反映呢個物業好有潛質。
長實嘅西九龍宇晴軒，已經開始咗一連串軟銷活動，噚日介紹平台建築特色。
今次以歐洲色彩做主題，設計成十萬方呎嘅歐洲園林，長實郭子威話，參照西班牙、希臘同法國等國家嘅建築特色，重特別準備咗三張南歐式園藝花園嘅靚相畀大家參考。例如碧綠嘅草地、七彩繽紛嘅花園等。
郭子威話，由於宇晴軒有唔少單位向東，為咗凸顯旭日初升嘅感覺，係平台花園會有紅、黃太陽嘅地面裝飾，連地下點布置都照顧周到，相當有心思。
蘭西
電郵地址：
