日前梁詠琪（GiGi）表示自幼受母親教導要積穀防饑，所以至今雖賺錢不少，但也不會胡亂花費。GiGi表示有錢會置業保值，待老年可有瓦遮頭，她還會一直工作至六十歲才言休，希望老來可有精神寄託。
梁詠琪日前接受女性雜誌《Azure》訪問，大談自己理財有方，GiGi近年除了發展歌唱事業，還接拍了不少電影和廣告，有消息指GiGi的身家有五千萬，她說：「好誇張呀！對我嚟講呢個係天文數字，實際賺幾多就唔好講，總之喺逆市之中可以保持唔錯嘅收入，我已經好開心。」
GiGi很愛買房子保值，雖有多幢物業，但仍租住西貢匡湖居，她說：「我鍾意先租地方，睇吓好唔好住，先決定買唔買。我買樓唔係抱住投資嘅心態，只係為咗將來環境變壞，至少重有瓦遮頭，觀念係好傳統。我又會買有儲蓄成份嘅保險，咪當積穀防饑。」
GiGi又表示平時最大開支是置裝，每年約花三十至四十萬元，但她會把穿過的衣服賣出套現。她說：「我會刻意提醒自己唔好太奢侈，其實量入為出係好重要。我又會好注重健康，免得老咗要畀大筆醫療開支，所以我諗將來嘅生活應該有保障。」
GiGi這種謹慎的理財態度，是受母親影響，她說：「媽咪一直教我未識搵錢唔應該先學使錢，所以讀書時我要靠補習去賺零用，𠵱家我都唔會先使未來錢。」
此外，GiGi堅持要做到六十歲才退休，她說：「即使年紀大做唔到幕前，開舖頭都好，總之做到六十歲先退休。乜都唔做好難過日辰。」
撰文：比華利