呢排人人為老董擔心邊度搵人同佢犧牲做財司，點知唐英年阿媽前日竟然爆料，話佢個仔諗緊好唔好答應老董。
雖然身在加拿大嘅唐公子否認同阿媽傾過公務，但係唐英年出名孝順，所以唐媽媽嘅說話當然可以當真。唐媽媽勸個仔唔好接呢個燙手山芋，所謂「巧婦難為無米炊」，稅唔准加，福利唔准減，政府又冇水，你話點做？唐媽媽一直望子成特首，做財爺分分鐘中箭下馬，佢咁講一啲都唔出奇，而且亦分析精闢，唔係一般師奶。
唔知唐公子係咪已經諗清楚，佢噚日突然通知香港，會縮短行程，由加拿大直接返港，因為有「公務」要處理，八方問係乜嘢公務咁重要，係咪趕住返嚟做財爺？佢哋話冇人可以答到呢條問題。
按原定行程，唐公子七月二十七日至三十日應該喺滿地可出席非正式部長級會議，完咗之後，三十一日至八月一日應該去倫敦訪問兩天。咁忽然間話取消，搞到倫敦方面要臨時通知英國貿易及工業部同埋外交部，下次先至見冼寶田勳爵同韋明浩兩位次官。
至於返港機票，香港幫佢唔到，只好由唐公子同個助理自己喺加國搞掂。點都好，如果唐公子真係唔聽阿媽肯捱義氣，咁葉澍堃就可以鬆一口氣。
李家祥就更係幫到出面，話邊個做都好，首先要先解除阿松同老董定下○六至○七年滅赤、唔准發債借錢，又唔准再減公僕人工嘅框框。
傳真︰2623-9278
電郵︰