前港督府「御廚」，曾應邀到北京人民大會堂大顯廚藝宴貴賓，佢整嘅珍珠雞更令戴安娜王妃食唔停口；鄺炳均師傅，56歲，有資格亦有本錢過舒舒服服嘅退休生活。不過，鄺師傅對烹調嘅滿腔熱誠卻足以蓋過一切，令佢仍然享受大廚嘅工作，唔想浪費一身「大內級」廚藝。「之前幫過朋友搞私房菜，每星期到廚房忙三兩晚。」鄺師傅仍嫌唔夠喉，𠵱家自立門戶，終於可以日日喺廚房大顯身手。
記者：馬慶武 攝影：陳盛臣
逢星期一至三、五出版
今次鄺師傅開新舖，御廚變「譽廚」，主打嘅菜式全部係60、70年代嘅懷舊廣東菜，重大多數係英女皇、戴安娜王妃、前港督麥理浩一眾達官貴人食過兼讚不絕口嘅菜式。除咗呢個賣點外，鄺師傅鍾情懷舊廣東菜重有原因：「呢啲菜式，雖然唔係咩珍饈百味，不過烹調程序複雜，而且要花好多心機同成本，所以𠵱家出面好難食到。」
由於之前幫過私房菜館「黃色廚房門」當廚，所以鄺師傅今次嘅「譽廚」仍保留不少私房菜風味特色，不論午市或晚市都只有套餐供應。要歎齊份量十足嘅懷舊廣東菜，足足7餸1湯重有甜品有點心，就要晚市幫襯，如果只係想一試鄺師傅嘅手勢，又唔想咁Heavy，午市幫襯就最抵，一味小菜加埋荷葉飯、例湯、甜品都係$50。
喺68至78年間任港督府中菜總廚，到過北京人民大會堂大顯廚藝，一味寶鴨穿蓮，連當時嘅領導人鄧小平都要親自入廚房讚許一番，更曾到英國白金漢宮煮過兩餐畀英女皇歎……。不過講到最難忘就一定係戴妃訪港嗰次。當時已經唔係港督府「御廚」嘅鄺師傅，獲當時港督尤德邀請，負責照顧戴妃三日嘅膳食，第一日鄺師傅就炮製咗佢最拿手嘅點心珍珠雞，點知戴妃一口氣食咗6隻兼重想再食，要鄺師傅話：「珍珠雞好滯㗎，唔好食咁多，重有好多好嘢等你試。」戴妃先肯停口。所以就算今時今日相隔10多年，有好多客都指明話要一試鄺師傅親手炮製嘅珍珠雞。
午市套餐其中一款就有齊上湯蝦餃、灌湯餃、豬膶燒賣等懷舊點心，重配埋春卷同荷葉飯，$50就食到餐咁豐富嘅晏仔，確係幾抵。
採用一種名為「大魚」嘅淡水魚魚頭，魚雲特別多肉特別有魚鮮味。鄺師傅話𠵱家興用砂碢整魚雲煲，乾煎魚頭已經好難有得食。
豬肉、冬菇、雞肉、鹹蛋黃，傳統材料傳統製法，不過秘方調味得好，糯米煙韌味香又唔膩，加埋湧出嚟嘅鮮荷葉香味，難怪戴妃可以一口氣食6隻。
60、70年代興起，用整鑊約十両牛油炸香生猛海蝦，令每隻蝦每部份都充滿濃郁牛油香味。不過每炸一碟蝦都要換過一鑊牛油，都幾花成本。
譽廚（中環卑利街33號地下/25432135）
營業時間：上午11時半至下午2時半，下午6時至晚上11時
收費：午市套餐：$50/位
晚市套餐：$250/位7餸1湯1點心1甜品（最少兩位起）
