城中忽見兩條人龍，一條排皇馬波飛，一條排書展搶購好書。書展今年開雙，會展與牛棚書展打孖來。皇馬靚腳我都想睇，但無後生仔的衝勁露宿三日撲飛。還是去書展舒舒服服，順便捧場買本鄧明儀新鮮出爐的《出路》訪問錄。
《出》書集社會各階層念力，同心諗香港，為它諗彎轉，為它諗好橋，為它諗窿路。湊巧的是，書裏有不少被訪者建議香港人多讀書，搞每月讀一書運動，設立社區BookClub。書中自有黃金屋未必是真理，但沙士疫潮中，相關的書種幾乎斷市，市民求知心切確是事實。香港人自救，惟有向書中尋；找對書種，等於交上一個良伴，有商有量；自救路上，就不至形單影隻。鄧明儀這本《出路》，由新移民小朋友建議垃圾蟲罰掃街，掃到他們捉到另一個垃圾蟲才能脫罪，到理大學生建議在行人天橋、巴士站大搞民主牆，都有意思。亦有視障人士建議政府鼓勵綜援人士自願移居國內，即獲發30萬資助。16歲學生妹建議全港學生與上班族每個上學天和上班日捐出一元。一元運動估計每年籌到12億，協助減退財赤。全書訪問百多人，百多種建議，別開生面。作者在書末廣開言路，邀請讀者加入腦汁共震，實行在第二版中加料。你有乜好路數呢？