李健仁十年前與周星馳合作拍攝電影《武狀元蘇乞兒》時，飾演如花一角令人印象難忘。即將推出新書的李健仁，將大爆老同學星爺讀初中時的秘密。
李健仁是周星馳的中學同學，相信大家對這位大粒癦兼常挖鼻孔的「如花」有深刻印象。李健仁繼去年以如花之名開設水貨店後，今年再有新搞作，與田啓文（田雞）及甜筒輝兩位好兄弟合著《娛樂爆響口》一書，大爆圈中人秘密及奮鬥史。
如花在書中亦大爆星爺鮮為人知的往事，現時星爺身邊的美女猶如走馬燈，但原來星爺讀初中時，身為李小龍迷的他竟沉醉練武而不愛女人，並深信練武之人絕不能接近女色。
星爺當時正好跟如花這班好色男同學相反，如花日前接受訪問時說：「今次出書係想大家開心吓啫，我爆嘅都係大家童年時嘅往事同瘀事。我同星星（周星馳）當年真係有好大對比，佢好專注練功夫同運動，冇話追女仔，而我就比較外向，鍾意追女仔。」
談到星爺童年時的追女經歷，如花笑說：「佢嗰時真係好鍾意功夫，我幾驚佢係基呀！直至中五時佢先開始留意女生，談論女生嘅身材，尤其係見到身材好嘅女生時，佢終於開始有生理反應。」
如花接受訪問時，除一改其醜女形象，穿上噴血比堅尼泳裝示人，他更與甜筒輝合演一幕推油的香豔場面，十分惹笑。
採訪：羅慧敏
攝影：陳偉權
