二人組合DoubleR小時笑話百出，范振鋒因踩單車意外墮地，一度成為鍾無艷，幸得當年卡拉OK皇后、英皇高層霍紋希邀他拍MV，才使他走出毀容陰霾。而原名梁家輝的梁奕倫亦由細被人笑到大。
二人男子組合DoubleR兩位成員范振鋒（Ricky）和梁奕倫（Ronald），童年笑話多多。Ricky日前表示讀小學四年級時，踩單車發生意外，導致左邊臉出現一條E形疤痕，從此便被同學取笑為鍾無艷。
Ricky說：「嗰時我成塊臉毀晒容，阿媽喊到死咁滯，額頭同鼻樑都花晒，我表妹見到我直情大嗌，幾鬼傷心呀，雖然後尾大大吓笪疤痕淡咗，但都係好冇自信。」
英皇高層霍紋希（Mani）當年曾與其孖生妹妹拍攝不少MV，當時只有十五歲的Ricky在朋友介紹下認識對方，Mani還鼓勵他拍MV，他說：「嗰時Mani係卡拉OK皇后，我第一次見到Mani，覺得世界上點解會有咁靚嘅女人，我咁冇自信，佢都叫我拍MV，所以我哋係相識於微時。」
而Ronald原名梁家輝，與影帝梁家輝同名同姓，從小已令他倍受注目，他日前說：「我勁唔開心㗎，去親診所同補習社，一俾人嗌名就好尷尬，所以入咗電台後，何嘉麗幫我改咗梁奕倫呢個名，我都唔知幾開心。」
原來Ronald小時候也受過傷，他說：「我兩歲時喺BB床跌咗落地，搞到左額有笪疤痕，但人大咗，笪疤痕已經由額頭嘅左上角走咗去中間咯。」
採訪：朱芷瑩
