千秋不滅嘅高達，每逢出親Game，唔係射擊就係戰棋玩法，Fans終有一日會嗌悶。最新作《GUNDAMSEED》喺PS2上初嚟甫到，梗要加啲新鮮玩法畀機迷，喺必備射擊再加入如《FinalFight》般嘅橫向動作元素，大量拳腳招式似足街頭爛仔開片咁刺激。
記者：徐影龍
活動時間
8月2日(星期六)下午1:00-9:00
8月3日(星期日)下午1:00-9:00
地點：海港城海運大廈展覽大堂（LCX旁）
其實好耐之前，高達曾推出過格鬥玩法嘅街機Game，口碑頗為不俗，不過好似《GUNDAMSEED》咁嘅玩法就好少有，除咗要不斷應付畫面深處嘅MS敵人外，重不時有敵人前後埋身夾攻主角，呢個時候就如《FinalFight》般，以連環拳腳招呼敵人，最基本嘅連續技有3×△（拳），之後再加□（槍），簡簡單單就可組成攻擊力強大嘅招式，當然唔少得攻擊範圍極大嘅超必殺技，加埋遠處揸槍嘅MS不停偷襲，令到機迷十分手忙腳亂，十足十打爛仔交咁，不過玩落又幾爽快過癮喎。
《GUNDAMSEED》比其他高達Game更為變化多端，動畫設定為可換入唔同裝備，以應付唔同環境及敵人，如大刀專打埋身戰、長炮專打遠方敵艦等，更為多元化，尤其係大刀裝備嘅昇龍劍，將兩隻MS一齊「炒」嗰種快感，真係無與倫比。遊戲模式尚算豐富，初頭只有故事模式嘅PHASEMode，隨住劇情推進，逐步加入隱藏模式及機體，如第一關後，就會加入對戰模式，第二關後會加添AILESTRIKER換裝等，據筆者早排試過Debug版時，已知後期會有特多MS機體供選擇，相信會幾襟玩。
《GUNDAMSEED》及《頭文字DSP》都係PS2行貨重點暑假作品，兼會大搞比賽，《GUNDAMSEED》比賽要等到八月尾，不過「富士IMPREZA盃頭文字D極速傳說2003」就喺呢個禮拜搶先會機迷，除例牌嘅鍊車比賽及試玩外，重有蕭正楠同戴夢夢現身會Fans，同埋真正三級方程式賽車手李英傑等落場砌車，有心偷師嘅機迷要留意。SCEH更有着數益《蘋果》讀者，只要呢個星期日（8月3日）手持《蘋果日報》到場，就可免費獲得彈彈膠HARO（鐵球）一個，或PS2新作影像DVD一隻，名額各有五十個，想攞就要早啲入場喇。
