吳彥祖夥拍關錦鵬炮製的奇情驚慄片《妖夜迴廊》已完工，身兼演員和監製之職的他，原來亦有份投資。由於《妖》片並非商業片，所以不少電影公司都不願投資，但吳彥祖為捍衞創作自由，即使資金不夠充裕，仍要與一班志同道合的朋友共圓夢想。
吳彥祖近日為少女雜誌《COSMOgirl》擔任封面人物，穿上一身便服在戶外場地拍攝照片的他，還作狀換電燈泡和淋花，驟眼看來極有住家男人的感覺。
吳彥祖表示自己最有興趣去做的，是執導一齣黑色喜劇，雖然美夢暫難圓，但他已為一齣奇情驚慄電影《妖夜迴廊》，擔任演員兼監製。吳彥祖說：「我都唔係一個做事井井有條嘅人，其實喺呢部戲裏邊，我做劇本創作同選角嘅工作比較多。我覺得做監製唔單止係負責計數，重要負責解決問題，呢方面我比較在行。」
其實該片的導演李志超最初只是邀請吳彥祖參演其中一個角色，但由於電影缺乏資金，所以吳彥祖亦投資了一點錢，令他因而有機會與另一位監製關錦鵬合作，齊齊參與電影的幕後工作。
吳彥祖續說：「其實投資呢種非商業性電影好困難，我哋都曾經打算搵電影公司投資，但因為電影題材比較冷門，電影公司希望我哋修改故事內容，我哋唔係好想咁做。大家都認為呢個係一個好好嘅故事，即使電影公司唔認同，都唔代表呢部電影唔值得拍。咁我咪同一班志同道合嘅朋友一齊投資，寧願少一啲資金，換番多啲創作自由。」
撰文：比華利
圖片提供：《COSMOgirl》