組合Cookies四位成員Miki、Stephy、Theresa同Kary，日前喺三號風球下為新歌《一擊即中》拍MV，喺MV入面，四個餅女齊齊喺一個巨型氣球裏面不停咁走，但係氣球裏面嘅空氣又唔夠，佢哋大約拍咗五分鐘之後，工作人員發現一向好動嘅Kary，完全靜咗落嚟，大家就立刻將氣球嘅拉鏈拉開，等佢哋可以呼吸到新鮮空氣。
原來Kary好偉大，為咗唔想耽誤大家嘅時間，明知自己缺氧都唔出聲，頭暈暈一於死忍，嚇咗大家一跳。其他餅女都異口同聲話：「雖然Kary係最細，但佢亦係最體貼嘅一個，呢方面我哋都要向佢學習。」
而拍攝當日雖然颳起三號風球，但係天公都總算眷顧住四個餅女，起碼間唔中都有太陽出現，最後亦順利拍完啦。
章小蕙被指單方面宣布同男友Wilhelm分手，而Wilhelm又話章小蕙喺出席佢公司飯局時，唔止遲到，重喺飯局上寫稿。噚日章小蕙喺會展出席活動時話：「分手件事我以為佢意會到，分手要講㗎咩？當個氣氛到嘅時候，唔通要嗌場交先分手？總之係佢（Wilhelm）走寶啦。」
英皇新人吳浩康噚日去港台做訪問，大家唔好睇吳浩康年紀細細，原來佢已經係老闆級人馬，佢除咗開美容院之外，重同朋友夾份開糖果店，吳浩康有咁多後路，如果喺娛樂圈發展唔理想都唔使愁，但吳浩康話：「我唔係淨係諗後路，只係想學做生意，我都係同屋企人夾錢開嘅。」
台灣最近做咗個調查，研究十八歲到三十歲嘅後生仔女嘅性幻想對象，金城武高踞女性性幻想對象第一位，而男仔嘅性幻想對象就由徐若瑄居榜首，佢兩個對於自己得獎反應好唔同，金城武就話對呢啲話題感到麻木，而徐若瑄就話好開心，多謝大家支持咁話。
李思蓓噚日喺沙田宣傳新片《阿龍的故事》，陪長者唱歌兼派禮物，呢排佢日日為無綫新劇《無名天使3D》開工，有傳套劇主角佘詩曼同郭羨妮化敵為友，一齊排擠楊思琦，李思蓓就話開工嘅時候氣氛好好，唔覺有咁嘅事，重話雖然同佢哋對手戲唔多，但都見過阿佘同楊思琦有傾有講。
