擁有碧咸、朗拿度、施丹、費高、卡路士、魯爾等巨星的皇家馬德里，還未到埗，已經掀起猶如十號波般強勁的旋風，除了歷史上最貴的門券成必搶目標外，波衫、精品到寫真絕對不可錯過，𠵱家一於睇睇市面的皇馬熱賣產品，讓各位成為真真正正的Fans。
記者：區佩嫦
攝影：周旭文、林栢鈞
要到場捧皇馬，梗係要買番件皇馬波衫，新球季的球衣當然沿用白色戰衣，不過款式與上年略為不同，上年球衣有衣領，今年則設計成無領款式，踢波時更爽更舒服。眾多印有球員名稱及號碼的球衣中，最多人撐都係23，可見碧咸的魔力有幾大。熨球員名同號碼一般需$150，若熨碧咸、朗拿度及費高的話則需$200。
售價：$450（352大本營）
皇馬作客波衫以灰色為主，我覺得個款較主場靚，除了灰襯金，夠Sharp外，款式同主場亦有分別，不過當然以白色的主場波衫最受歡迎。負責人透露第二作客的黑色球衣則於今日到港，到時球迷又有另一選擇。
售價：$420（352大本營）
朗拿度的球衣銷售情況不錯，但當然以碧咸最勁，睇嚟哨牙仔迷要多啲支持偶像至得喇。
阿文：「我好鍾意碧咸，但就唔鍾意皇馬，我都係因為碧咸先買件皇馬波衫，（係咪買嚟着去睇波？）唔係，我都無諗住睇，我件波衫都係買嚟收藏。」
據球衣店負責人阿Roy表示，呢一兩日皇馬球衣好多人買，可能新聞關係，所以特別多人搶。咁多個皇馬球星中，以碧咸最多人買，差不多大部份人都係印23號。「以往皇馬的波衫未算最受歡迎，大約排第六位，相信今年在排行榜會排先好多，我諗會同曼聯有得爭。」
售價：$159（SFALO）
市面上皇馬的精品唔算太多，無曼聯同利物浦咁多花臣，不過勝在實用。呢個皇馬波砵袋最啱踢波時用嚟放球靴，由於體積較大，可一次過放兩對鞋都得。
售價：$119（SFALO）
與波砵袋同款的銀包，同以尼龍質料製成，內裏間格四正，可以放埋信用卡及紙幣，夠晒實用。
無論你係瞓足幾日幾夜都買唔到飛，抑或係無時間排隊買飛，但又想現場睇波，等我教你用另類途徑搶門票，不過要睇吓有冇錢同有冇運氣。
網上拍賣是最簡單的方法，不過就較為嘥錢，分分鐘要用多3的價錢先買到心水靚飛。香港有幾個網上拍賣的網站都成為熱門的bid飛場，以昨日中午為止，red-dots算是最多人放飛的網站，兩張$1,500的門票已炒至$3,600，要成功bid飛，最緊要有財力。
網址：
adidas買$500皇馬產品
到adidas專門店購買皇馬產品滿$500或以上，可獲抽獎券一張，獲大獎的5位幸運兒可獲贈入場券2張，截止日期為8月4日。
查詢：
崇光買滿$2,000玩射龍門
由今日至8月3日於崇光購物累積滿$2,000，可免費玩「勁射入門贏球飛」遊戲，有機會贏取總值$1,000的皇馬球票兩張，幸運兒共有十位。
登記Orange無線投注服務
由即日起至8月3日，Orange的客戶凡成功登記Orange無線投注服務或選用$8足球資訊服務，有機會贏取$1,500貴賓門票或普通門票兩張。
查詢：
入3網站玩捉球競賽
自問判斷力不錯的朋友，可入3網站玩「捉球競賽」，猜中足球中心點的位置，有機會贏得3張$1,500或$800的門票。
查詢：
食碧咸朱古力
只要到零食物語購買碧咸為代言人的朱古力一盒，可獲抽獎券一張，頭獎可獲皇馬門票2張，截止日期為8月3日。
無論你係皇馬忠實Fans定係「臨時」Fans，呢本喺書展及即將在漫畫節展出的《夢幻皇馬》絕對是必搶產品。呢本寫真是皇馬授權出版的中文版刊物，入面有齊現役球員及退役球員的資料外，還有皇馬的創立及歷史資料，近200頁的資料夠晒詳盡。隨書奉送錄咗皇馬這幾十年嚟球賽的精華片段VCD，但美中不足的是內文全為簡體字，部份球員譯名與香港人叫開的有分別，無咁親切。
售價：$90（書展1D21號攤檔）
臨急抱佛腳想睇簡單資料的話，呢本啱啱推出嘅天書就啱你，入面亦有各皇馬球星的資料及靚相，簡單易明，最啱對足球一無所知，只睇靚仔的女Fans。聽報攤阿叔講，出咗一個下午已經賣咗幾本，都算OK，但賣晒就未必再補。
售價：$15（各書報攤）
