鄭裕玲（嘟嘟）投身演藝界已二十八年，對幕前演出仍然充滿熱誠，並立志要做一朵「藝壇長青花」。但她亦明白女藝人始終有老去的一日，會在適當時候引退。
鄭裕玲由已結業的佳視做到現在的無綫，屈指一算入行已二十八年，但她表示永遠向前望，誓要做一朵「藝壇長青花」。
問嘟嘟過往最喜歡自己哪套劇集和角色？是跟周潤發合演的電視劇《網中人》，還是與黃子華合作的處境劇《男親女愛》？她說：「毫無疑問，我好鍾意《網中人》呢套劇，佢係我嘅成名作。但係我覺得要做個長青藝人，係唔應該懷念過去，有啲嘢過咗去就算，要永遠向前望，咁先會進步。」
嘟嘟認為自己可以兼顧演戲和司儀的工作，十分幸運，她說：「有啲藝人，佢哋雖然好有演戲天份，但係冇觀眾緣，最後都徒勞無功。我最好彩係出道至今，一直都好有觀眾緣，做戲同司儀工作都得到觀眾支持。」
演戲和司儀，嘟嘟最喜歡那樣？她說：「我覺得做戲可以代入唔同角色，但係做司儀就完全係另一回事。司儀主持一個節目，可以控制到全部嘅氣氛。」嘟嘟精湛的演技，除了因為她積累了豐富的人生經驗外，平時她會看不同種類的電影，從中吸取別人的演技。
嘟嘟又說：「我好滿足現狀，起碼𠵱家有能力可以挑選自己鍾意嘅工作先去做，比好多舊人幸福。一個人一定要有工作，呢啲係精神寄託，咁樣個人先唔會同社會脫節。
「若嫌工作太忙，我可以放吓假，休息夠，我又會返工作崗位繼續嘗試，同埋面對挑戰。不過作為一個女藝人，始終會有老去嘅一日，我認為只要人貴乎自知就可以，我知自己幾時要進，幾時要退。」
採訪：比華利
攝影：何國豪
