黃耀明曾與張國榮合作大碟《CrossOver》，對於張國榮的離世，黃耀明感到很難過，更直言十分佩服張國榮敢愛敢做，公開自己的性取向，他又表示與張國榮是同一類人。
黃耀明的感情生活一直是個謎，雖然多年來外間對他的性取向有不同的揣測，但他堅持不會公開感情事。
曾與張國榮合唱《這麼遠那麼近》的黃耀明，坦言十分欣賞張國榮對工作及愛情的投入，他說：「我覺得哥哥（張國榮）敢愛敢做嘅行為好值得佩服，我可以話自己都係同一類人，但係為咗保護我身邊嘅人，我冇工作時盡量都唔會去一啲會有傳媒出現嘅地方，我亦都唔想放工之後都係見到行內人，至於人哋點樣去揣測我唔會理。」
黃耀明認為沒有必要將感情生活暴露於人前，他笑言：「咁樣估估吓都幾好吖，起碼佢哋對我有幻想，總之我對感情嘅宗旨係『心不死』，因為冇追求嘅話，一切嘅事就會變得冇希望。」
對於近日一些歌手及唱片公司人員牽涉入樂壇貪污案，黃耀明表示：「咁多年都聽過話頒獎禮唔公平，但呢啲始終係傳聞，如果要去審判呢件事就必須要有證據。我入行十七年都唔係得到好多獎，但係我唔覺得係自己唔夠好，有獎項只係錦上添花，其實一直以嚟都有咁多人買我嘅碟、支持我，我認為呢啲先係一個大獎，所以我唱到七十歲都會繼續唱落去。」
採訪：李珮洳
攝影：陳志嵐
