已經七十一歲嘅玉婆伊莉莎伯泰萊（ElizabethTaylor），照計應該可以安享晚年，點知最近佢嘅前度園丁雲邁頓（VanMuyden）突然入稟洛杉磯高等法院，告玉婆違反口頭協議，欠佢十年人工合共二十九萬四千美元（約二百二十九萬港元），呢位園丁重爆玉婆同男管家拉凱文（Jean-LucLacquement）有景轟㖭，真係冤孽。
話說前度園丁雲邁頓，當年曾經將玉婆豪宅個花園設計成一個迪士尼樂園式森林，佢話俾人炒完全係因為佢拒絕咗玉婆管家拉凱文嘅性要求。雲邁頓話，試過有一次佢同男管家拉凱文喺廚房相遇，拉凱文竟然嚟一招猴子偷桃，一手抓住佢兩粒睪丸，重話好愛佢咁話，雲邁頓梗係即刻彈開啦，之後拉凱文就同佢講要去「跳老彈床」（指與玉婆歡好），雲邁頓即提議佢食偉哥。
𠵱家雲邁頓告拉凱文性騷擾兼性別歧視，不過玉婆律師就話佢俾人炒，完全係因為佢請非法移民同恐嚇其他員工。講真我羅拉聽完單案都𢱑晒頭，其實玉婆早排出嚟行兩步都暈咁滯，都幾難想像佢對性重有咁大需求。