小初真係唔明，工業股已經炒咗咁耐，但仍然有人樂此不疲，完全唔肯收手。
經紀陳話，聽傳媒朋友講，滙多利（607）今日將帶團到東莞睇廠，所以噚日股價先有反應，大升7%，收1.07元，但成交就好細，只得259萬元。
小初記得滙多利去年上市即刻潛水，直至臨近上市6個月禁售期前，股價先至Mark番上去，然後在6月份，滙多利大老闆以每股0.84元，配售1100萬股予一名機構投資者，之後股價就開展升浪，早排最高見過1.13元才出現回吐，但跌至0.96元已有支持反彈，現時又升近高位。
至於呢位機構投資者係何方神聖，小初就唔多清楚，但除咗呢位仁兄之外，滙多利確係有其他芬佬坐咗貨。不過，小初有啲唔明，點解造風扇嘅邊際利潤咁好？
另外，i100（616）噚日終於停牌，話搞併股同埋供股。經紀陳話，一早預咗i100加入抽水大家庭之後，亦會跟隨玩供股，所以非常慶幸在i100股價波動時，忍住手冇落場跟炒。
慕容小初