保加利亞一代球星史杜捷高夫申請美國綠卡終獲批准，呢一紙綠卡可以話嚟得及時，因為咁華盛頓聯隊至決定留用佢，令佢響球員事業晚年都逃過俾棄用嘅厄運，唔使臨老都過唔到世。
史杜捷高夫今季踢十四場入七球，以三十七歲老將嚟講重可以響體力化嘅大聯盟立足，簡直係足球大智慧嘅表現。不過，隊波唔想佢長期霸住三個外援名額之一，諗過棄用佢。𠵱家史杜捷高夫攞到綠卡，會方自然想佢留效，而佢可以繼續踢波兼保住個助教職位，真係一樂也。
講開呢個老將，最近佢去身在美國嘅巴塞隆拿軍營探班，當見到美國球迷着住皇馬波衫去睇巴塞隆拿練波，佢就一肚火，鬧人無足球知識，唔明歐洲隊至忌呢味嘢。幾十歲重咁好火，球王你係得嘅。
些路迪喺前日場歐冠盃次圈首回合賽事就認真威水，作客立陶宛嘅卡奧拿斯大勝四比○；不過，卻喺返國途中遇上「九霄驚魂」，佢哋飛機喺起飛前突然急停，原來發生故障，機師最後更放棄起飛。結果，些路迪嘅職球員就要喺立陶宛過多一晚夜。
兩支同以W為隊徽主要圖案，以及都係着綠色衫嘅德國球隊禾夫斯堡同雲達不來梅，喺禮拜三嘅圖圖盃命運各異，禾夫斯堡作客克羅地亞大勝四比一，但係不來梅就淨吞柏斯澄四蛋，我求大俠諗不來梅畀人數大大鑊，士氣受損，聽日德甲首仗要作客哈化，隨時畀人打落水狗。
祖迪告魯夫流年不利，離開咗曼聯後一直頭頭碰着黑，上屆踢艾拉維斯更加踢到降班，日前終於可以自由轉會愛斯賓奴，總算有着落。我求大俠見到佢好欷歔，話晒佢都係一代名將告魯夫個仔，曾係荷蘭隊主力，所以話人生總有起跌，不過最緊要係跌低咗可以企番起身。
所謂有人辭官歸故里，有人漏夜趕科場，愛華頓中場尼雅高日前竟然加盟咗中國甲A嘅瀋陽金德，諗下中國國腳李鐵就雖然好想留低喺愛華頓，但係就到𠵱家都未必搞得掂。不過，我求大俠相信尼雅高走咗對李鐵係好事，因為李鐵可以少咗競爭對手。