嘩！地鐵（066）物業發展權都未被收回，中期盈利就已經大跌93%至1.13億元，幸而每股重有14仙中期息，股息率3%，仍比銀行存款理想。股價今早難免會受壓，不過要留意係下半年會有30億元來自國金二期的利潤入帳，全年業績表現應該唔會太差，否則地鐵又點會儍到賺2仙派14仙呢。至於港府收回物業發展權一事，除非政府靠搶，否則就要補償，所以唔應該對股價有太大負面影響。
孫公最終都冇新救市措施出籠，只係擺晒啲數據出嚟，話未來樓宇落成量下降，跟住又話可能撤銷限制炒樓措施，似乎想同市場玩一場心理戰，因為置業人士一見到炒家入市，就會心急買樓，免得買貴樓，屆時樓市就真係炒得起。港股午後升13點，收報10134。
孫公講完嘢之後，地產股硬朗咗，奇怪係弱勢嘅地產股麗展（488）及世城系股價勁升。市場傳出大摩地產基金有意用10億元買麗展嘅銅鑼灣廣場二期，富豪（078）就傳話可能以REITs形式出售酒店物業套現。麗展股價勁升48.7%，收5.8仙，富豪升31%，收8.9仙，百利保（617）升31%，報9.7仙，世城（355）升40%，收3.5仙。
上午市場傳出合和公路（737）以每股4.50元定價，比上下限4.10-4.75元的中間價高，市場覺得定價唔錯，繼而炒高佢阿媽合和實業（054）逾3%，點知收市後再傳出以4.18元定價，唔知跟炒者今日會唔會掟番合和轉頭呢？
阿虎