上星期日（七月二十七日）本欄講「讀中七」，最尾一段，人數多咗一個，惡佬明睇到，立即打電話嚟：「喂，你一家五口咩，點解多咗一個，係唔係養多一個，我哋咁老友都唔知！」哎吔，乜手民之誤咁大件事，立即去搵原稿望吓，搵緊之時，老婆已經開聲：「喂，你解釋點解一家有五個人！」當堂頭都暈晒，好彩搵到原稿畀佢一望，原先係寫咗「兩個攞一級榮譽嘅」，後來改番做「一個」，但個一字寫得細，編輯或者睇唔到，咪搞到幾乎產生家庭誤會囉。
點解咁都會寫得唔清楚？皆因犬女畢業時攞magnacumlaude榮譽，左丁山誤以為等於一級榮譽，寫完稿睇一次，先至醒起magna之上重有一個summacumlaude，下有一個cumlaude，所以magna最多係等於香港嘅二級甲等榮譽啫，於是即刻改正，點知字迹太細，致有此誤會。
再更正一點，一位中大教授話畀左丁山聽，八十年代中大用「暫取生」制，曾做過統計測試中學會考成績與大學GPA（平均績點）嘅相互關係，唔係與攞「榮譽」嘅相互關係，不過，高GPA嘅多數肯定攞honour，二者分別唔算太大。呢位教授講，會考成績好嘅尖子（當時叫暫取生），喺中大嘅GPA亦多數相對地高，二者有重要相互關係。現在大學廣收尖子之後，三幾年後應有同樣嘅統計測試，如果得到相同結果，就知道讀中七嘅增值作用唔多大嘞。