期指結算日，未有出現挾淡倉鏡頭，恒指回落77點，調整一吓好應該。8月期指散121點，低水104點，對大市或者有啲啟示作用，就係個市會再調整些少。8月份有啲大藍籌除息，可能因此之故，期指先行低水。
中信泰富（267）曾見14.80元，收14.70元，逆市進帳1格。沙士過後，航空公司業務漸復正常，中信係國泰（293）與港龍大股東，都有得益，做番好啲亦都合理。中信睇好，可以吼吓啲Call輪，最熱門嘅係9646，好多人炒上炒落，140球易手，收10仙，跌1格，明年3月到期，溢價10.7%，槓桿率14.7倍，因為夠晒長命，又有夠勁嘅槓桿率，溢價並唔離譜。唔望咁高，正股見番15.50元計，揸隻輪大概有40%利錢落袋。
其實有件中信Call輪好抵買，就係9604，11月到期，現價12.3仙，溢價得3.6%，槓桿率12倍，不過最大問題，係好難買賣，全日成交量唔夠1球。
中海油（883）前日升1.15元，昨日跌85仙，拖低隻Call輪9535，由37仙碌落29仙，跌幅22%。隻輪12月到期，溢價0.6%，槓桿率4.5倍，數據好靚，等正股再調整些少，執啲9535博反彈。正股先幾日畀啲芬佬踢到半天高，唔會冇下文嘅。
章盛